काठमाडौं । चीनमा जारी १९औं एसियन गेम्सको महिला फुटबलतर्फ समूह चरणको दोस्रो खेलमा नेपालले आज एसियन पावर हाउस तथा पूर्व विश्व च्याम्पियन जापानको सामना गर्दैछ ।

वेन्झु ओलम्पिक स्पोर्टस सेन्टर स्टेडियममा नेपाली समयअनुसार ५ः३० बजेदेखि शुरु हुने समूह डी तर्फको नेपाल र जापानबीचको खेल नेपालका लागि विशेष पनि छ ।

सन् २०११ को फिफा महिला विश्वकप विजेता जापान विरुद्ध नेपाललाई आफु अनुकुल नतिजा ल्याउन कठिन देखिए तापनि नेपाली टोलीले जापानसँग खेल्दै धेरै अनुभव र सिक्ने अवसर भने पक्कै पाउने छन् ।

समूह चरणतर्फ नेपालले आफ्नो पहिलो खेलमा भियतनामसँग २–० को हार बेहोरेको थियो भने जापानले बंगलादेशलाई ८–० को फराकिलो अन्तरले हराएको थियो ।

समूह डी तर्फ कै अर्को खेलमा आज नेपाली समयअनुसार १ः४५ बजेदेखि भियतनाम र बंगलादेश भिड्दै छन् । यो खेलमा भियतनामले बंगलादेशलाई हराएको खण्डमा नेपालले आफ्नो सम्भावना कायम राख्न जापानलाई हराउनै पर्ने दबाब पनि हुनेछ ।