शनिश्चरे । झापाको अर्जुनधारा ११ मा जारी प्रथम लक्ष्मीधाप जिल्लास्तरीय नकआउट फुटबल प्रतियोगितामा आज भएको तेस्रो क्वाटरफाइनलमा विजयी हुँदै बिर्तामोड खोपबाडीको न्यू स्टार क्लब सेमिफाइनलमा प्रवेश गरेको छ ।

प्रतिस्पर्धी बिर्तामोड युनाइटेडलाई १-० गोलको साँघुरो जित दर्ता गर्दै न्यू स्टारले अन्तिम चारमा स्थान बनाएको हो । पेनाल्टीमार्फत गोल गर्दै न्यू स्टारले बिर्तामोड युनाइटेडको चुनौती समाप्त बनाएको हो ।

खेलको २१औँ मिनेटमा न्यू स्टारले पेनाल्टी पाउँदा रोमन भुजेलले मौका गुमाएनन् । रोमनकै गोल निर्णायक सावित भयो । उनी खेलको म्यान अफ दी म्याच बने । उनले नगद २ हजार ५ सय पाए ।

झापाका ८ टिम सहभागी प्रतियोगितामा भोलि (मंगलबार) काँकरभिट्टा ट्रेनिङ सेन्टर र शिवसताक्षी एफसीबीच अन्तिम क्वाटरफाइन खेल हुनेछ । कात्तिक ४ गते हुने फाइनल खेलको विजेताले नगद ५१ हजारसहित ट्रफी पाउने छ भने उपविजेताले नगद ३१ हजारमा चित्त बुझाउनु पर्नेछ ।