काठमाडौं । गत भदौमा निधन भएका फिफा सहायक रेफ्री बिक्रम चौधरीको परिवारलाई एन्फा मातहतको रेफ्री विभाग र रेफ्री संघले आर्थिक सहयोग गरेको छ । संघले एक कार्यक्रमका बीच दिवंगत रेफ्री बिक्रमको बाँसबारी स्थित निवास मै पुगी उनको धर्मपत्नी अन्जु चौधरीलाई नगद ७५ हजार सहयोग हस्तान्तरण गरेको हो ।

उक्त रकम संघका अध्यक्ष बुद्धि बहादुर गुरुङ्गले स्व. चौधरीको परिवारलाई हस्तान्तरण गरेका हुन् । सो रकम विभिन्न रेफ्री, संघ, शुभेच्छुकहरुबाट संकलन गरि दिवंगत फिफा सहायक रेफ्री बिक्रम चौधरीको परिवारलाई हस्तान्तरण गरिएको रेफ्री संघका कोषाध्यक्ष सचिन अमात्यले बताए ।

सो अवसरमा रेफ्री संघका उप–महासचिव रोजेन श्रेष्ठ, सदस्य शैलेश जोशी, रेफ्री विभाग प्रमुख गोकुल थापा लगायतको उपस्थिति रहेको थियो ।

स्मरण रहोस, गत भदौ १ गते आर्मी मूख्यालयमा नियमित अभ्यासका क्रममा दिवंगत फिफा सहायक रेफ्री बिक्रम चौधरी अचेत भई ढलेका थिए । उनलाई तत्कालै छाउनी स्थित सेनाको अस्पतालमा पुर्याइए तापनि त्यहाँ चिकित्सकहरुले उनलाई मृत घोषित गरेका थिए ।