काठमाडौं । साफ यु–१९ च्याम्पियनसिप खेल्ने तयारीमा रहेको नेपाली यु–१९ महिला फुटबल टोलीलाई हौसला प्रदान गर्न चर्चित जापानी गैर नाफामुलक संस्था रियले वल्र्डले खेल सामाग्रीहरु हस्तान्तरण गरेको छ ।

बिहीबार एक कार्यक्रमका बीच अखिल नेपाल फुटबल संघ (एन्फा) का अध्यक्ष पंकज विक्रम नेम्वाङ, रियले वल्र्डकी सचिव सिकाको मियामोटोले महिला खेलाडहिरुलाई खेल सामाग्रीहरु हस्तानतरण गरे । सो अवसरमा एन्फा कार्यसमिति सदस्य सरिला श्रेष्ठ मलेकु, कोषाध्यक्ष रविन्द्र जोशी र एन्फा प्रवक्ता सुरेश साह लगायतको उपस्थिति रहेको थियो ।

स्मरण रहोस, आउँदो फेब्रुअरी २ देखि ८ तारीखसम्म बंगलादेशको ढाकामा हुन गईरहेको साफ यु–१९ महिला च्याम्पियनसिपका लागि हाल नेपाली टोली बन्द प्रशिक्षणमा छ । नेपालले आफ्नो पहिलो खेल २ फेब्रुअरीका दिन आयोजक बंगलादेशससँग खेल्दै प्रतियोगिताको शुरुवात गर्नेछ ।

प्रतियोगितामा नेपाल, बंगलादेश, भुटान र भारत गरी दक्षिण एसियाका कुल चार टोलीहरु सहभागि छन् । सिंगल राउण्ड रोबिनका आधारमा हुने प्रतियोगिताको लिग चरणको खेल पश्चात शिर्ष दुई टोली फाइनलमा प्रवेश गर्ने छन् । आयोजक बंगलादेश प्रतियोगिताको डिफेन्डिङ च्याम्पियन पनि हो ।