काठमाडौं । फिफा विश्वकप छनौटतर्फ समूह एचमा रहेको नेपालले युएई विरुद्धको दोस्रो लेगको खेलमा पनि समान अन्तरको हार बेहोरेको छ । पहिलो लेगतर्फ युएई कै घरेलु मैदानमा ४–० ले पराजित भएको नेपालले बिहीबार साउदी अरेबियाको दमाम शहरमा फेरि युएईसँग ४–० कै हार बेहोरेको छ ।

नेपालमाथि पूर्ण हावदी देखिएको युएईका लागि खेलको १२ र १४औं मिनटमा हरेब अब्दलाले लगातार दुई गोल गर्दै टोलीलाई शुरुवाती समय मै दुई गोलको स्पष्ट अग्रता दिलाएका थिए । अधिकांश समय दबाबमा रहेर खेलेको नेपाल विरुद्ध युएईले थप दुई गोल दोस्रो हाफमा गर्यो ।

५३औं मिनटमा अलि सालेहले युएईका लागि तेस्रो गोल गरे भने ७५औं मिनटमा हाजिम मोहम्मदले चौथो गोल गर्दै यूएईको सहज जित पक्का गरेका थिए । अब नेपालले समूह चरणको अन्तिम खेल ११ जुनका दिन सोही मैदानमा यमनसँग खेल्नेछ ।

यो नतिजापछि शतप्रतिशत जितका साथ युएई ५ खेलबाट १५ अंकका साथ शिर्ष स्थानमा छ । ९ अंकका साथ बहराईन दोस्रो स्थानमा रहँदा ३ अंक जोडेको यमन तेस्रो स्थानमा छ । अंकविहीन नेपाल पुछारमा छ । बहराईन र यमनले एक–एक खेल कम खेलेका छन् । र बिहीबार राती नै यमन र बहराईन पनि भिड्ने कार्यक्रम छ ।

(फाईल तस्विर)