गिरुबारी । संघर्षपुर्ण जितका साथ भेडाबारी युवा क्लब यहाँ जारी ३८औं युनाइटेड गोल्डकप खुला नकआउट फुटबल प्रतियोगिताको क्वाटरफाइनलमा प्रवेश गरेको छ ।

भेडाबारीले प्रिक्वाटरफाइनलतर्फ भैरव स्पोर्टस क्लबलाई टाईब्रेकरमा ५–४ ले हराउँदै क्वाटरफाइनल यात्रा तय गरेको हो । त्यसअघि निर्धारित समयको खेल दुवै टोलीले १–१ गोलको बराबरी खेलेका थिए ।

टाईब्रेकरमा भने भेडाबारीले नतिजा आफ्नो पक्षमा पार्यो । प्रतियोगिता अन्तर्गत भदौ १९ गते बुधबारको खेल युनाइटेड युवा क्लब (ग्रिन) र एभरेष्ट क्लब बीच हुने आयोजकले जानकारी दियो ।

युनाइटेड युवा क्लब, गिरुबारीको आयोजनामा जारी प्रतियोगिताको विजेताले उपाधिसहित नगद २ लाख ५० हजार हात पार्नेछ भने उपविजेताले १ लाख ५० हजार हात पार्नेछ । फाइनल खेल भदौ २९ गतेका दिन हुनेछ ।