मानेभञ्ज्याङ । आउँदै गरेको महान चाड विजयादशमीको अवसर पारी लिब्जु न्यु स्टार युवा क्लब, मानेभञ्ज्याङ–३, ओखलढुंगाको आयोजनामा असोज २० देखि २४ गतेसम्म प्रथम लिब्जु कप २०८१ फुटबल प्रतियोगिता हुने भएको छ ।

मानेभञ्ज्याङ–३, उँबु, तारकोम स्थित स्थानीय खेलमैदानमा हुने प्रतियोगिताको असोज १७ गतेसम्म टिमदर्ता खुला गरिएको छ । आयोजकका अनुसार प्रतियोगिता खुला पुरुष, महिला र भेट्रान्स गरी तीन विधाहरुमा हुनेछन् ।

खुला पुरुषतर्फ टिमदर्ता शुल्क ३५०० तोकिएको छ भने महिलातर्फ २५०० र भेट्रान्सतर्फ ३५०० टिमदर्ता शुल्क तोकिएको आयोजकले जानकारी दियो । भेट्रान्स प्रतियोगिताका लागि सम्बन्धित खेलाडीहरुले अनिवार्य नागरिकता पेश गर्नुपर्ने पनि आयोजकले जनाएको छ । प्रतियोगिताका केही खेलहरु रात्रीकालिन पनि खेलाइने आयोजकले जानकारी दियो ।

त्यस्तै प्रतियोगिताको खुला पुरुष र भेट्रान्सतर्फ प्रथम हुने टिमहरुलाई नगद ५०–५० हजार सहित ट्रफी र मेडल प्रदान गरिनेछ भने र महिलातर्फ नगद रु. २५,००० सहित ट्रफी र मेडल प्रदान गरिनेछ । त्यसैगरी खुला पुरुष र भेट्रान्सतर्फ द्वितीय हुने टिमहरुलाई नगद २०–२० हजारसहित ट्रफी र मेडल प्रदान गरिनेछ भने महिलातर्फ नगद १० हजारसहित ट्रफी र मेडल प्रदान गरिने आयोजकले जनाएको छ । त्यस्तै विधागततर्फ उत्कृष्ट हुने खेलाडीहरुलाई पनि उचित पुरस्कारको व्यवस्था गरिएको आयोजकले जानकारी दियो ।