इलाम । इलामको सूर्योदय नगरपालिका ५ श्रीअन्तुस्थित गोरखमा दोस्रो गोरख भेट्रान कप फुटबल प्रतियोगिता कात्तिक दोस्रो साता हुने भएको छ ।

आयोजक गोरख टोल विकास संस्थाले आज पत्रकार सम्मेलन गरी प्रतियोगिताको दोस्रो संस्करणबारे जानकारी दिएको हो । प्रतियोगितामा ८ टोलीको सहभागिता रहने बताइएको छ ।

 आउँदाे कात्तिक ७ गतेदेखि १० गतेसम्म हुने प्रतियोगिताको विजेताले नगद ७० हजार र ट्रफी पाउने खेल संयाेजक विकास तामाङले जानकारी दिए । उनका अनुसार उपविजेताले नगद ३५ हजार पाउने छ ।

 प्रतियोगितामा इलाम र झापाका ५ वटा र भारतका ३ टोलीको सहभागिता रहने भएको छ । जसमा आयोजकसँगै फिक्कल, इलाम, बिर्तामोड, दमक तथा भारतका दार्जीलिङ, बुङकुलुङ र सिक्किमका टोली रहेका छन् ।

 यसपटक खेलाडीको बीमा पनि गरिएको आयोजकले जनाएको छ । नेको इन्स्यूरेन्ससँगको कार्यमा बीमा गरिएको हो । प्रति खेलाडी २ लाखकाे दरले बीमा गरिएकाे जनाइएकाे छ ।

 प्रतियोगिता सम्पन्न गर्न ६ लाख ३५ हजार खर्च लाग्ने अनुमान आयोजकको छ । गोरख टोल विकास संस्थाका अध्यक्ष ललित तामाङको अध्यक्षतामा पत्रकार सम्मेलन भएको थियो ।