शनिश्चरे । झापाको अर्जुनधारा १ स्थित सहिद टेक-मान रंगशालामा असोज १४ गतेदेखि डा.सा.ब. युवा क्लबको आयोजनामा दोस्रो प्रदेशस्तरीय फुटबल प्रतियोगिता हुने भएको छ ।

रंगशालामा आज आयोजित पत्रकार सम्मेलनमा १० टोली सहभागी रहने प्रतियोगिताको फाइनल खेल असोज २३ गते हुने जानकारी दिइयो ।

प्रतियोगिता संयोजक बेनुकुमार राईका अनुसार प्रतियोगिताको विजेताले नगद ५० हजार र ट्रफी पाउने छ भने उपविजेताले नगद ३० हजारमा चित्त बुझाउनु पर्नेछ । यसैगरी, प्लेयर अफ दी म्याचसँगै अन्य विधागत पुरस्कार पनि रहेको जनाइएको छ ।

संयोजक राईका अनुसार प्रतियोगिता सम्पन्न गर्न करिब ५ लाख रुपैयाँ खर्च हुने अनुमान गरिएको छ । वडा कार्यालय, सामाजिक संघसंस्था, फुटबलप्रेमी, सामुदायिक वन कार्यालयको सहयोगमा प्रतियोगिता सम्पन्न हुने भएको छ ।

प्रतियोगितामा आयोजकसँगै शनिश्चरे एफसी, न्यू स्टार क्लब खोपबाडी, जामुनखाडी, बाहुनडाँगी, न्यू भिजन युथ क्लब, झापा एफसी, त्रिवेणी एफसी, सैनिक ११ र मुजुरभिट्टा केरखाको सहभागिता रहने भएको छ ।