काठमाडौं । नेपाली समुदायहरुबीच फुटबलको माध्यमबाट आपसी भाईचारा र आत्मियता कायम गर्ने उद्देश्यका साथ युएईको अजमानमा पहिलो पटक फूटबल प्रतियोगिता हुने भएको छ । दिपावली (तिहार) को अवसर पारेर अजमानमा रहेको एभरेष्ट मम: नेपाली रेस्टुरेन्टको आयोजनामा एभरेस्ट म:म: तिहार सेभेन एसाइड कप फूटबल प्रतियोगिता हुन लागेको हो ।

आगामी शनिबार अर्थात १९ – २० अक्टोबर स्पोर्टस सीटी अलनादामा हुने प्रतियोगितामा १६ वटा क्लबले प्रतिस्पर्धा गर्ने भएका छन । रसअलखेमा र आबुधावीबाट २ वटा, उम्मलक्विन र अजमान बाट एउटा क्लब र बाँकी दुबइबाट गरी १६ क्लबले प्रत्योगितामा प्रतिस्पर्धा गर्ने आयोजक एभरेस्ट मम: नेपाली रेस्टुरेन्टका सन्चालक बिष्णु अधिकारीले जानकारी दिए ।

प्रतियोगितामा उपाधी विजेताले नगद ३ हजार धिराम्स अर्थात १ लाख १० हजार रुपैया, र दोस्रो हुनेले १८ सय अर्थात झन्डै ६० हजार रुपैया र सेमीफाइनलमा पुग्ने क्लबहरुले ५ सय धिराम्स नगद सहित कप र मेडल पाउने प्रतियोगिताका सम्योजक राहुल श्रेष्ठले बताए । प्रतियोगिताको तयारी पूरा भएको र खेलतालिका समेत प्रकाशित गरिएको श्रेष्ठले बताए । अजमान क्षेत्रमा पहिलो पटक नेपाली समुदायमा फूटबल प्रतियोगिता हुन लागेको हो ।