काठमाडौं । नेपाली राष्ट्रिय महिला फुटबल टोलीकी स्टार फरवार्ड साबित्रा भण्डारी आइतबार मध्यरातमा नेपाल आइपुग्ने भएकी छिन् । हाल फ्रान्सको शिर्ष महिला लिगमा गुइनग्याम्पका लागि व्यवसायीक फुटबल खेलिरहेकी साबित्रा आइतबार राती १ बजे नेपाल आइपुग्ने बताइएको छ ।

साबित्रा हाल घरमै जारी साफ महिला च्याम्पियनसिपका लागि नेपाल फर्किन लागेकी हुन । फ्रान्स व्यस्त लिग फुटबलका लागि साबित्राले साफ महिला च्याम्पियनसिपको समूह चरणतर्फ पहिलो खेलमा भुटान विरुद्धको खेल गुमाएकी थिईन् । सो खेलमा नेपालले भुटानसँग गोलरहित बराबरीमा रोकिन पुगेको थियो ।

नेपालले साफ महिला च्याम्पियनसिपतर्फ सोमबार आफ्नो दोस्रो खेलमा माल्दिभ्सको सामना गर्दैछ । नेपालका लागि यो खेल निकै महत्वपूर्ण पनि हुनेछ । यद्यपि यो खेलमा साबित्रा मैदानमा उत्रिने, नउत्रिनेबारे स्पष्ट भईसकेको छैन । स्मरण रहोस, समूह बी तर्फ माल्दिभ्सले पहिलो खेलमा श्रीलंकासँग हार बेहोरेको थियो । त्यस्तै सोमबार नै श्रीलंका र भुटान पनि भिड्दै छन् ।

Pic: ANFA