काठमाडौं । उपाधिको बलियो प्रत्याशी र साविक विजेता समेत रहेको एपिएफ फुटबल क्लब जारी एन्फा महिला लिग राष्ट्रिय फुटबल प्रतियोगिताको फाइनलमा प्रवेश गरेको छ ।

शनिबार भएको क्वालिफायर वान तर्फ एपिएफले अर्को विभागीय टोली त्रिभुवन आर्मी फुटबल क्लबलाई २–१ ले हरायो । एपिएफको जितमा दुवै गोल रश्मी कुमारी घिसिङले गरीन् । आर्मीका लागि भने हिमा चौधरीले गोल गरेकी थिईन् ।

हारका बावजुद आर्मीको फाइनल प्रवेश गर्ने सम्भावना भने कायम छ । आर्मीले अब क्वालिफायर टु तर्फ सोमबार अर्को विभागीय टोली नेपाल पुलिस क्लबसँग खेल्नेछ । पुलिसले शुक्रबार मात्रै भएको इमिमिनेटरतर्फ बागमती युवा क्लबलाई १–० ले हराउँदै क्वालिफायर टु मा स्थान बनाएको थियो ।

फाइनल खेल भने आउँदो माघ १६ गते बुधबारका दिन दशरथ रंगशालामा हुने कार्यक्रम छ ।