काठमाडौं । सोमबारदेखि शुरु चारदेशीय महिला च्याम्पियनसिपमा घरेलु टोली नेपालले साँघुरो अन्तरको जित निकाल्दै प्रतियोगितामा विजयी शुरुवात गरेको छ ।

दशरथ रगशालामा भएको खेलमा नेपालले किर्गिस्तानमाथि १–० को झिनो अन्तरको जित निकाल्यो । खेलको दशौं मिनटमा बिमला चौधरीले गरेको एक मात्र गोल नेपालको जितमा निर्णायक गोल साबित बन्यो ।

खेलमा नेपालले विपक्षीमाथि दबाब कायम गरे तापनि थप गोल गर्न भने सकेन । नेपालले आफ्नो आगामी खेल बिहीबार लेबनानसँग खेल्नेछ । सोही दिन किर्गिस्तानले म्यानमारको सामना गर्नेछ ।

स्मरण रहोस, सोमबार नै भएको पहिलो खेलमा म्यानमारले लेबनानमाथि ३–१ को प्रभावशाली जित हात पारेको थियो ।