काठमाडौं । नेपाली फुटबल खेलाडीहरुको छाता संगठन नेपाल फुटबल खेलाडी संघको पहलमा मोरङ जिल्ला, बेलबारी निवासी युवा खेलाडी सन्देश आचार्यको निःशुल्क घँुडाको शल्यक्रिया सम्पन्न भएको छ ।

सन्देशको शल्यक्रिया खेलाडी संघको सहयोगी संस्था बी एण्ड बी अस्पतालमा सम्पन्न भएको हो । फुटबल खेलाडी संघले खेलाडीहरुको उपचारको पहल थालेयता सन्देश सुविधा उपभोग गर्ने २ सय ११औं खेलाडी रहेको समेत संघले जनाएको छ ।

करिब ८ महिनासम्म उपचारका लागि सन्देशले स्थानीय रुपमा कुनै सहयोग नपाएपछि बेलबारी फुटबल क्लबका प्रतिनिधि शंकर सुबेदीले फुटबल खेलाडी संघसँग सहयोगका लागि पहल गरेका थिए । अनि मात्र सन्देशको शल्यक्रिया सम्भव भएको हो ।

खेलाडी संघका अध्यक्ष बिक्रम लामाले दुःख र कठिन परिस्थतिमा परेका खेलाडीहरुलाई खेलाडी संघले सकेको सहयोग गर्ने बताए । साथै उनले खेलाडी संघको पहलमा शल्यक्रिय गरेका धेरै खेलाडीहरु हाल एन्फाको फिजियोथेरापी विभागमा निःशुल्क परामर्श तथा फिजियो गरेर मैदानमा फर्कने तयारी गरिरहेको समेत बताए ।