काठमाडौं । जारी साफ यु–२० महिला च्याम्पियनसिपतर्फ दावेदार मध्ये एकका रुपमा हेरिएको आयोजक बंगलादेशले लगातार तेस्रो जित हात पार्दै आफ्नो शतप्रतिशत जितको लयलाई कायम राखेको छ ।

समूह चरणतर्फको आफ्नो तेस्रो खेलमा मंगलबार बंगलादेशले भुटानलाई ४–१ ले हरायो । मंगलबारको खेल भने बर्षाले बिथोलिए दुई फरक स्थानमा खेलाइएको थियो ।

पहिलो हाफ बसुन्धरा किंग्स एरिनामा खेलाइए तापनि बर्षाका लागि मैदानको अवस्था खराब भएपछि दोस्रो हाफ केही अबेर नजिकैको अभ्यास मैदानमा खेलाइएको थियो ।

यो नतिजापछि बंगलादेश ३ खेलबाट ९ अंकका साथ शिर्ष स्थानमा यथावत छ । पराजित भुटान भने ३ अंकका साथ तेस्रो स्थानमा छ । उता एक खेल कम खेलेको नेपाल ३ अंकका साथ दोस्रो स्थानमा छ र केहीबेर मै श्रीलंकासँग खेल्दैछ । श्रीलंका भने अंकविहीन रुपमा पुछारमा छ ।