काठमाडौं । न्युरोडटिम (एनआरटी) ले एन्फा महिला लिग छनौटतर्फ बुधबार महत्वपूर्ण जित हात पार्दे राष्ट्रिय महिला लिगका लागि छनौट हुने सम्भावना बनाएको छ ।

समूह बी तर्फको खेलमा एनआरटीले बुधबार बुटवल लुम्बिनी एफसीलाई २–० ले हराएपछि राष्ट्रिय महिला लिग छनौटको सम्भावना बलियो बनेको हो । च्यासल खेलमैदानमा भएको खेलमा एनआरटीका लागि जुना तामाङ र प्रतीक्षा चौधरीले गोल गरिन् ।

यो जितसँगै ५ खेलबाट १२ अंक जोडेको एनआरटी समूह बी तर्फ दोस्रो स्थानमा छ । समूह चरणको छैठौं खेलमा ९ अंक जोडेको झापा एफसीले बराबरी खेले एनआरटी राष्ट्रिय महिला लिगका लागि छनौट हुनेछ । समूह बी बाट संकटाले यसअघि नै राष्ट्रिय महिला लिगमा स्थान बनाईसकेको छ ।