काठमाडौं । साफ यु–१७ च्याम्पियनसिपतर्फ नेपालले समूह चरणको आफ्नो दोस्रो तथा अन्तिम खेलमा फराकिलो हार बेहोर्दा सेमिफाइनल प्रवेशको सम्भावना पनि अनिश्चित बनेको छ ।

समूह ए मा रहेको नेपालले बिहीबार बंगलादेशससँग ४–० ले पराजित हुन पुग्यो । यो नतिजापछि २ खेलबाट ३ अंक जोडेको नेपाल समूह ए को दोस्रो स्थानमा छ भने एक खेल कम खेल्दै बंगलादेश समान ३ अंकका साथ शिर्ष स्थानमा छ ।

समूह ए तर्फको अन्तिम खेलमा अब सेप्टेम्बर २१ तारीखका दिन बंगलादेश र आयोजक श्रीलंका भिड्नेछन् । यो खेलको नतिजाबाटै नेपालको सेमिफाइनल प्रवेशको सम्भावनाबारे टुंगो लाग्नेछ । स्मरण रहोस, नेपालले आफ्नो पहिलो खेलमा श्रीलंकालाई २–० ले हराएको थियो ।