हेटौडा । यहाँ जारी एन्फा प्रेसिडेन्ट लिगतर्फ काक्रेबिहार युथ क्लब, सुर्खेतले बिहीबार रोमाञ्चक जित हात पार्दै खातामा महत्वपूर्ण तीन अंक जोडेको छ ।

हेटौडा–६, मकवानपुर स्थित गौरीटार रंगशालामा भएको खेलमा काक्रेबिहारले हैरान्स क्लब, तनहुँलाई ३–२ ले हराउँदै महत्वपूर्ण तीन अंक जोडेको हो ।

काक्रेबिहारको जितमा सुजन बलम्पाकी मगर, आशिष चापागाईं र अनिष घर्ती क्षेत्रीले गोल गरे । उता पराजित हैरान्सका लागि भने समिराज थोक र विश्व लामाले गोल गरेका थिए । खेलमा काक्रेबिहारका रोहन कार्की म्यान अफ दि म्याच बने ।

अखिल नेपाल फुटबल संघ ९एन्फा० को आयोजना तथा मकवानपुर जिल्ला फुटबल संघको प्राविधिक सहयोगमा जारी प्रतियोगिता लिगकम नकआउटका आधारमा हुनेछ । प्रतियोगिताको विजेताले उपाधिसहित १० लाख हात पार्नेछ भने उपविजेताले ५ लाख प्राप्त गर्नेछ ।