काठमाडौं । एन्फा राष्ट्रिय लिग फुटबल प्रतियोगिता अन्तर्गत मंगलबार भएका दुई खेलहरु बराबरीमा टुंगिएका छन् ।

एन्फा कम्प्लेक्समा भएको दिनको पहिलो खेलमा चित्लाङ फुटबल क्लबले विभागीय टोली नेपाल पुलिस क्लबसँग १–१ गोलको बराबरी खेल्यो । अन्तिमतिर खाएको आत्मघाती गोल नै चित्लाङलाई महत्वपूर्ण जितबाट बञ्चित बनाउन पुग्यो ।

खेलको ४१औं मिनटमा म्याथ्यु बाबाटुन्डेको गोलबाट चित्लाङले खेलमा अग्रता बनाएको थियो । तर खेलको अन्तिमतिर ८७औं मिनटमा लक्षुमन राना मगरले आत्मघाती गोल गर्दै पुलिसले खेललाई बराबरीमा ल्याउन सफल भएको थियो । खेलमा पुलिसका जोन बिष्ट प्लेयर अफ दि म्याच चुनिए ।

त्यस्तै मंगलबार नै भएको दिनको दोस्रो खेलमा त्रिभुवन आर्मी फुटबल क्लब र प्लानिङ ब्वाईज युनाइटेडले गोलरहित बराबरी खेल्दै अंक बाँडे । खेलमा प्लानिङ ब्वाईजका गोलरक्षक योगेश धिमाल प्लेयर अफ दि म्याच घोषित भए ।