त्रियुगा । संकटा फुटबल क्लब उदयपुरमा जारी एन्फा महिला च्याम्पियनसिपको सेमिफाइनलमा प्रवेश गर्ने चौथो तथा अन्तिम टोली बनेको छ । मंगलबार भएको चौथो क्वाटरफाइनलमा संकटाले चर्च ब्वाइूज युनाइटेडलाई ४–१ ले हराउँदै अन्तिम चारको यात्रा तय गर्न सफल भएको हो ।

संकटाले अब फागुन ७ गते हुने दोस्रो सेमिफाइनलमा दावेदार मध्ये एक एपिएफ फुटबल क्लबसँग खेल्नेछ । त्यस्तै फागुन ६ गते बुधबार हुने पहिलो सेमिफाइनलमा दुई विभागीय टोली नेपाल पुलिस क्लब र त्रिभुवन आर्मी फुटबल क्लब भिड्ने छन् ।

अखिल नेपाल फुटबल संघ (एन्फा) को आयोजनामा जारी प्रतियोगिताको विजेताले उपाधिसहित नगद ७ लाख ५० हजार हात पार्नेछ भने उपविजेताले ५ लाख प्राप्त गर्नेछ । फाइनल खेल यही फागुन ९ गतेका दिन हुनेछ ।