काठमाडौं । एन्फा राष्ट्रिय लिग फुटबल प्रतियोगिता अन्तर्गत फागुन ३० गते शनिबार भएका दुई खेलहरु समान अन्तरको बराबरी नतिजामा टुंगिएका छन् ।

एन्फा कम्प्लेक्समा भएको दिनको पहिलो खेलमा जनजागृति युवा क्लब र सातदोबाटो युवा क्लबले १–१ गोलको बराबरी खेल्दै अंक बाँडे । खेलमा जनजागृतिका लागि बिक्रम थोकरले गोल गर्दा सातदोबाटोका लागि अरुण लामाले गोल गरेका थिए ।

यो नतिजापछि लिगमा पहिलो अंक जोड्न सफल जन जागृति १० खेलबाट १ अंकका साथ पुछार मै छ । उता सातदोबाटो भने ८ अंकका साथ १४औं स्थानमा छ ।

त्यस्तै शनिबार नै दशरथ रंगशालामा भएको दोस्रो खेलमा न्युरोडटिम (एनआरटी) ले श्री भगवती क्लबसँग समान १–१ गोलको बराबरी खेल्यो । भगवतीका लागि बाख्रोमजोन तुर्गुनपुलाटोवले गोल गरे भने एनआरटीका लागि अन्जन बिष्टले गोल गरेका थिए ।

यो नतिजापछि ११ खेलबाट २० अंक जोडेको एनआरटी लिगतालिकाको सातौं स्थानमा छ । भगवती भने ९ अंकका साथ लिगतालिकाको १२औं स्थानमा छ ।