काठमाडौ.। एन्फा राष्ट्रिय लिग फुटबल प्रतियोगिता अन्तर्गत आइतबार भएका तीन खेलहरु मध्ये दुई खेलमा निश्चित जित र एक खेलमा बराबरी नतिजा निस्किएको छ ।

एन्फा कम्प्लेक्समा भएको पहिलो खेलमा जावलाखेल युथ क्लबले काँक्रेबिहार क्लबलाई ४–१ को अन्तरले हरायो । जावलाखेलको जितमा निकोलस ह्यामिल्टनले दुई गोल गर्दा बौबाकर सिसोखो र बिकास दर्लामीले एक–एक गोल गरे । काँक्रेबिहारका लागि दिपेन्द्र चुनाराले एक मात्र गोल गरेका थिए ।

यो नतिजापछि १० खेलबाट १३ अंक जोडेको जावलाखेल लिगतालिकाको दशौं स्थानमा छ । पराजित काँक्रेबिहार भने १ अंकका साथ पुछारतिर १६औं स्थानमा छ ।

त्यस्तै आइतबार नै भएको अर्को खेलमा चित्लाङ फुटबल क्लब र एपिएफ फुटबल क्लबले गोलरहित बराबरी खेल्दै अंक बाँडे । यो नतिजापछि ११ खेलबाट २५ अंक जोडेको एपिएफ लिगतालिकाको दोस्रो स्थानमा छ । उता चित्लाङ भने १२ खेलबाट ८ अंकका साथ १३औं स्थानमा छ ।

त्यसैगरी आइतबार नै भएको तेस्रो खेलमा फ्रेण्डस क्लबले चर्च ब्वाईज युनाइटेडलाई २–० ले पराजित गर्यो । यो जितपछि १० खेलबाट १२ अंक जोडेको फ्रेण्डस लिगतालिकाको ११औं स्थानमा छ । पराजित चर्च ब्वाईज भने २२ अंकका साथ चौथो स्थानमा छ ।