काठमाडौं । एन्फा राष्ट्रिय लिग फुटबल प्रतियोगिता अन्तर्गत बुधबार पहिलो खेलमा फ्रेण्डस क्लब र जावलाखेल युथ क्लबले बराबरी खेल्दा अर्को खेलमा चर्च ब्वाईज युनाइटेडले शानदार जित हात पारेको छ ।

एन्फा कम्प्लेक्समा भएको दिनको पहिलो खेलमा फ्रेण्डस र जावलाखेलले १–१ गोलको बराबरी खेल्दै अंक बाँडेका हुन् । खेलमा जावलाखेलका लागि बिकास दर्लामीले गोल गर्दा फ्रेण्डसका लागि प्रशान्त लक्षमले गोल गरेका थिए ।

यो नतिजापछि ११ खेलबाट १४ अंक जोडेको जावलाखेल लिगतालिकाको आठौं स्थानमा छ । उता फ्रेण्डस भने १३ अंकका साथ लिगतालिकाको ११औं स्थानमा छ ।

बुधबार नै भएको दोस्रो खेलमा चर्च ब्वाईजले संकटा फुटबल क्लबलाई ५–२ को अन्तरले हरायो । चर्च ब्वाईजको जितमा सुमित श्रेष्ठले दुई गोल गर्दा मिलन राई र रोहन कार्कीले समान एक–एक गोल गरे । थप एक गोल भने विपक्षी टोली संकटाका बिबेक मगरले आत्मघाती गोलका रुपमा गर्न पुगेका थिए । उता संकटाका लागि भने रिचार्ड र बिबेक राईले गोल गरेका थिए ।

यो जितपछि ११ खेलबाट २५ अंक जोडेको चर्च ब्वाईज शिर्षता कै होडमा छ । र, शिर्ष स्थानको मच्छिन्द्रसँग समान अंक भए तापनि गोलभिन्नताले पछि पर्दै दोस्रो स्थानमा छ । पराजित संकटा भने १३ अंकका साथ लिगतालिकाको दशौं स्थानमा छ ।