शिवराज । जागृति युथ क्लब र आयोजक शिवशक्ति युवा क्लब (रातो) कपिलवस्तुमा जारी दोस्रो शिवशक्ति कप खुला नकआउट फुटबल प्रतियोगिताको सेमिफाइनलमा प्रवेश गरेका छन् ।

शिवराज नगरपालिका–१, कलौनी स्थित शिवशक्ति खेलमैदानमा शुक्रबार भएको पहिलो क्वाटरफाइनलमा जागृतिले शिवगढी साइनिङ स्टार युथ क्लबलाई २–० ले पराजित गर्यो । जागृतिको जितमा अनिश रोका र सुशिल कुँवरले गोल गरे । खेलको प्लेयर अफ दि म्याच पनि जागृति कै गोलकर्ता अनिश रोका घोषित भए ।

त्यस्तै शुक्रबार नै भएको दोस्रो क्वाटरफाइनलमा आयोजक शिवशक्ति (रातो) ले न्यु सृजनशील युथ क्लबलाई ३–१ ले हरायो । शिवशक्तिको जितमा सुरज चौधरी, कप्तान आशिष जिसी र अभिषेक महतोले गोल गरे । पराजित न्यु सृजनशीलका लागि भने कुमार लामाले एक मात्र गोल फर्काएका थिए । खेलमा शिवशक्ति कै केश्मान जिएम प्लेयर अफ दि म्याच बने ।

प्रतियोगिता अन्तर्गत चैत्र १४ गते शनिबार अन्तिम दुई क्वाटरफाइनल खेलहरु हुनेछन् । दिनको पहिलो खेलमा सुर्यमुखी युथ क्लब र शिवगढी युथ क्लब भिड्नेछ भने दोस्रो खेलमा ग्रीन भिजन युथ क्लब र द ब्राईट युथ क्लब भिड्ने खेल संयोजक अर्जुन शर्माले जानकारी दिए ।