हाल नेपाल भ्रमणमा रहेका फिफाका दुई पदाधिकारीहरुले रौतहटमा रहेको महिला फुटबल एकेडेमीको निरीक्षण गरेका छन् । फिफाको एमए सर्भिस डाइरेक्टर थियोडोर जियानीकोस र फिफा डेभलपमेन्ट अफिसर प्रिन्स रुफुसले चन्द्रनिगाहपुरमा रहेको महिला फुटबल एकेडेमी निरीक्षण गरेका थिए ।

सो अवसरमा उनीहरुलाई स्थानीय महिला फुटबल खेलाडीहरुले फूलमाला सहित न्यानो स्वागत पनि गरेका थिए । स्मरण रहोस, अखिल नेपाल फुटबल संघ (एन्फा) ले निर्माण गरेको सो एकेडेमीका लागि आवश्यक आर्थिक सहयोग भने फिफाले नै गरेको थियो ।

नेपाली फुटबलको इतिहास मै पहिलो आवासीय महिला फुटबल एकेडेमीका रुपमा रहेको यो एकेडेमी निर्माणका लागि फिफाले चार करोड भन्दा बढी रकम सहयोग गरेको थियो ।

सो अवसरमा एन्फाका केन्द्रिय अध्यक्ष कर्मा छिरिङ शेर्पा तथा रौतहट, सर्लाही लगायतका जिल्ला फुटबल संघका अध्यक्षहरुको पनि उपस्थिति रहेको थियो । एन्फाका अनुसार उक्त एकेडेमी दशैभरिबाट उत्कृष्ट महिला फुटबल खेलाडीहरु छनौट गरी सक्दो छिटो सञ्चालन गर्ने बताएको छ ।