म्याङलुङ । सनराईज युवा क्लब, म्याङलुङ–८, तेह्रथुमको आयोजनामा शुक्रबारदेखि सनराईज कप खुला नकआउट फुटबल प्रतियोगिता शुरु भएको छ ।

म्याङलुङ–८ कोबेक स्थित स्थानीय खेलमैदानमा प्रतियोगिताको पहिलो दिन दुई खेलहरु सम्पन्न भए । पहिलो खेलमा टिएसएसले आयोजक सनराइज युवा क्लब (बी) लाई पेनाल्टीमा हरायो । त्यस्तै दोस्रो खेलमा सुनसरी एफसीले साप्ला भेट्रान्समाथि सडन डेथमा जित निकाल्यो ।

म्याङलुङ वार्ड नम्बर ८ को कार्यालय, तेह्रथुमको मुख्य प्रायोजन रहेको प्रतियोगिताको विजेताले उपाधिसहित १ लाख २१ हजार हात पार्नेछ भने उपविजेताले ६१ हजारसहित ट्रफी, मेडल र प्रमाणपत्र प्राप्त गर्नेछ ।

त्यस्तै व्यक्तिगत विधातर्फ पनि आकर्षक पुरस्कारको व्यवस्था गरिएको खेल संयोजक महेन्द्र लिम्बुले जानकारी दिए । प्रतियोगितामा कुल १९ क्लबहरुले सहभागिता जनाएका छन् ।