बुटवल । यहाँ जारी दोस्रो इभोलुशन कपको पहिलो क्वाटरफाइनलतर्फ फर्साटिकर युवा क्लब र हिमाल युथ क्लब बीचको खेल भारी वर्षाका कारण रोकिएको छ । खेलको दोस्रो हाफतर्फ अन्तिम केही मिनट बाँकी रहँदा भारी वर्षा भएपछि खेल रोकिन पुगेको हो ।

खेल रोकिदासम्म फर्साटिकरले हिमाल विरुद्ध २–१ को अग्रता कायम राखेको थियो । त्यसपछि निरन्तर वर्षाले खेल प्रभावित हुन पुग्दा अन्तिम समयमा खेल रोकिएको थियो । आयोजक क्लबका अध्यक्ष राम बहादुर पुनका अनुसार बुधबार रोकिएको खेल बिहीबार ३ बजे रोकिए कै समयबाट खेलाइने बताए ।

इभोलुशन क्लब अफ बुटवलको आयोजनामा जारी प्रतियोगिताको विजेताले उपाधिसहित नगद १,०५,५५५ रुपैयाँ हात पार्नेछ भने उपविजेताले ५२,२५० रुपैयाँसहित ट्रफी, मेडल र प्रमाणपत्र प्राप्त गर्ने आयोजक क्लबका अध्यक्ष राम बहादुर पुनले बताए । फाइनल खेल जेठ १० गतेका दिन हुनेछ ।