काठमाडौ । फिफा विश्वकप छनौटतर्फ समूह एचमा रहेको नेपालले मंगलबार राती यमन विरुद्ध समूह चरणको आफ्नो अन्तिम खेल खेल्यो ।

साउदी अरेबियाको दमाम शहरमा भएको खेलमा नेपालले यमनसँग २-२ गोलको रोमाञ्चक बराबारी खेल्यो र प्रतियोगितामा अंक जोड्दै विश्वकप छ्नौटको यात्रा समापन गर्यो ।

खेलमा शुरुवाती अग्रता यमनले लिएको थियो । खेल शुरु भएको नवौं मिनेटमै नासेर अल गाहवशीले पेनाल्टीमार्फत पहिलो गोल गरे । तर २२औं मिनेटमा सन्जिव विष्टले नेपालका लागि बराबरी गोल फर्काए ।

पहिलो हाफ १-१ को बराबरीमा सकिए तापनि दोस्रो हाफको ६६औं मिनेटमा जिलेस्पी जंग कार्कीको गोलबाट नेपालले खेलमा २-१ को अग्रता बनायो ।

तर त्यो अग्रता नेपालले अन्तिम समयमा गुमाउन पुग्यो । इन्जुरी समयमा मोहम्मद अल-दाहीले यमनका लागि दोस्रो गोल गर्दै खेललाई २-२ को रोमाञ्चक बराबरीमा टुंग्याएका थिए ।

मंगलबार नै भएको समूह एचको अर्को खेलमा युएई र बहराईनले पनि १-१ गोलको बराबरी खेल्दै अंक बाँडेका छन ।

यो नतिजापछी ६/६ खेलबाट १६ र ११ अंक जोडेका युएई र बहराईन क्रमशः पहिलो र दोस्रो स्थानमा छन । सन २०२७ को एसियन कपका लागि छ्नौट भएका छन भने विश्वकप छनौटको तेस्रो चरणमा समेत प्रवेश गरेका छन ।

त्यस्तै ५ र १ अंक जोडेका यमन र नेपाल भने क्रमशः तेस्रो र चौथो स्थानमा छन ।