काठमाडौं (एजेन्सी) । दश खेलाडीमा खुम्चिएर पनि झिनो अन्तर र रोमाञ्चक जितका साथ कोलम्बिया जारी ४८औं कोपा अमेरिकाको फाइनलमा प्रवेश गर्ने दोस्रो टोली बनेको छ ।

बिहीबार बिहान सम्पन्न खेलमा कोलम्यियाले पन्ध्र पल्टको विजेता उरुग्वेलाई शून्यका विरुद्ध १ गोलको झिनो अन्तरले हराउँदै उपाधि नजिक पुग्न सफल भएको हो ।

खेलको ३९औं मिनटमा जेफर्सन लेर्माले गरेको एक मात्र गोल कोलम्बियालाई फाइनल पुर्याउन निर्णायक गोल बन्यो ।

त्यस्तै खेलको पहिलो हाफतर्फ अतिरिक्त समयमा कोलम्बियाका डेनियल मुनोजले रातो कार्ड खाँदै मैदान छाड्दा टोली दश खेलाडीमा खुम्चिएका थिए । तर, उरुग्वेले त्यसको फाइदा उठाउन सकेन ।

कोलम्बियाले अब १४ जुलाईका दिन मियामीमा हुने फाइनलमा डिफेन्डिङ च्याम्पियन अर्जेन्टिनाको सामना गर्नेछ । त्यस्तै पराजित उरुग्वेले १३ जुलाईका दिन क्यानडासँग तेस्रो स्थानका लागि खेल्नेछ ।