काठमाडौं । आइतबारदेखि शुरु भएको ललित स्मृति एन्फा युथ लिग यु–१८ फुटबल प्रतियोगितामा न्युरोडटिम (एनआरटी) र खुमलटार फुटबल क्लबले विजयी शुरुवात गरेका छन् ।

सातदोबाटो स्थित एन्फा कम्प्लेक्समा भएको उद्घाटन खेलमा एनआरटीले चर्च ब्वाईज युनाइटेडमाथि २–१ को जित निकाल्यो । एनआरटीका लागि दुवै गोल विज्ञान खड्काले गरे भने चर्च ब्वाईजका लागि अमन तामाङले गोल गरेका थिए ।

आइतबार नै भएको दोस्रो खेलमा खुमलटारले सातदोबाटो युथ क्लबमाथि शून्यका विरुद्ध २ गोलको जित दर्ता गर्यो । खुमलटारका लागि एलिक श्रेष्ठ र जंगे रायमाझीले गोल गर्दै टोलीलाई महत्वपूर्ण तीन अंक दिलाए ।

त्यसअघि प्रतियोगिताको उद्घाटन एक कार्यक्रमका बीच अखिल नेपाल फुटबल संघ (एन्फा) का अध्यक्ष पंकज विक्रम नेम्वाङ लगायतका पदाधिकारीहरुले संयुक्त रुपमा गरेका थिए ।

डबल राउण्ड रोबिन लिगका आधारमा हुने प्रतियोगितामा कुल १२ टोलीहरु सहभागि छन् । लिगको शिर्ष स्थान हासिल गर्ने टोली विजेता बन्नेछ । विजेताले उपाधिसहित नगद १ लाख हात पार्नेछ भने दोस्रो स्थान हासिल गर्ने टोलीले ५० हजार प्राप्त गर्नेछ ।