भरतपुर । युवा स्टार फुटबल क्लब, चितवनको आयोजनामा आउँदो असोज १७ देखि २४ गतेसम्म प्रथम युवा स्टार कप सेभेन ए साईड फुटबल प्रतियोगिता हुने भएको छ ।

प्रतियोगिता संयोजक कल्याण बस्नेतका अनुसार प्रतियोगितामा चितवन जिल्ला र जिल्ला बाहिरका चर्चित क्लबहरु सहभागी हुनेछन् । प्रतियोगितामा सहभागी टिमको नाम टाई–सिट्मा सार्वजनिक गरिने संयोजक बस्नेतले बताए ।

प्रतियोगिताका खेलहरु भरतपुर–१०,चितवनमा अवस्थित मैयादेवी कन्या कलेज अगाडी रहेको चितवन मा वि को मैदानमा हुनेछ । प्रतियोगिताको विजेताले उपाधिसहित नगद ७० हजार हात पार्नेछ भने उपविजेताले ३५ हजारसहित ट्रफी, मेडल र प्रमाणपत्र प्राप्त गर्ने खेल संयोजक कल्याण बस्नेतले जानकारी दिए ।

त्यस्तै प्रतियोगिता आयोजनाका लागि आवश्यक तयारी पनि शुरु गरिसकिएको आयोजक क्लबका अध्यक्ष विक्रम थापा मगरले बताए । अध्यक्ष थापा मगरका अनुसार प्रतियोगिताको पहिलो संस्करण भएको कारणले यस संस्करणलाई विशेष रुपमा व्यवस्थित र भव्य बनाउने गरी तयारी थालिएको उनले बताए ।

यसैबीच प्रतियोगिताको मुख्य प्रायोजकमा मिनानो एजुकेसन प्रा.लि रहने भएको छ । त्यसै गरी यस प्रतियोगितालाई ई–प्लानेटले सह–प्रायोजकको रुपमा सहयोग गरेको छ ।