कावासोती । संघर्षपुर्ण जितका साथ नमुना युवा क्लब यहाँ जारी ३८औं युनाइटेड गोल्डकप खुला नकआउट फुटबल प्रतियोगिताको क्वाटरफाइनलमा प्रवेश गरेको छ ।

नमुनाले प्रिक्वाटरफाइनलतर्फ देवचुली युवा तथा खेलकुद विकास समितिलाई टाईब्रेकरमा ४–२ ले हराउँदै अन्तिम आठमा स्थान बनाएको हो । त्यसअघि निर्धारित समयको खेल दुवै टोलीले गोलरहित बराबरी खेलेका थिए ।

प्रतियोगिता अन्तर्गत भदौ १८ गते मंगलबारको खेल भैरव स्पोर्टस क्लब र भेडाबारी युवा क्लब बीच हुने आयोजकले जानकारी दियो ।

युनाइटेड युवा क्लब, गिरुबारीको आयोजनामा जारी प्रतियोगिताको विजेताले उपाधिसहित नगद २ लाख ५० हजार हात पार्नेछ भने उपविजेताले १ लाख ५० हजार हात पार्नेछ । फाइनल खेल भदौ २९ गतेका दिन हुनेछ ।