काठमाडौं । जेबि युनाईटेड फुटबल क्लब, जोहोर, मलेसियाको आयोजनामा यही सेप्टेम्बर १५ र १६ तारीखका दिन हुने दोस्रो जोहोर कप फुटबल प्रतियोगिताको तयारी अन्तिम चरणमा रहेको आयोजकले जनाएको छ ।

प्रतियोगिता आयोजना मिति नजिकिंदै आयोजकले सहभागिता जनाउने इच्छुक क्लबहरुलाई यथाशिघ्र टिमदर्ता गर्न अनुरोध समेत गरेको छ । आयोजकका अनुसार यही सेप्टेम्बर ८ तारीखसम्म टिमदर्ता गरिसक्नु पर्नेछ । तोकिए मिति भन्दा पछि दर्ता हुन आएका टिमहरुलाई दर्ता नगरिने आयोजकले जानकारी दियो ।

ऐरिना मुतियारा जे–ल्याण्डमा आयोजना हुने प्रतियोगितामा मलेसियामा रहेका नेपाली खेलाडीहरुले मात्र सहभागिता जनाउन पाउने पनि आयोजक क्लबका सचिव दिपक कार्कीले बताए ।

प्रतियोगिताको विजेताले उपाधिसहित नगद २० हजार मलेसियन रिंगेट हात पार्नेछ भने उपविजेताले १२ हजार मलेसियन रिंगेट प्राप्त गर्नेछ । त्यस्तै तेस्रो स्थान हासिल गर्ने टोलीले पनि ६ हजार रिंगेट प्राप्त गर्ने आयोजकले जानकारी दियो ।

त्यस्तै व्यक्तिगत विधातर्फ उत्कृष्ट हुने खेलाडीहरुलाई पनि उचित पुरस्कारको व्यवस्था गरिएको आयोजकले जनाएको छ ।