काठमाडौं (एजेन्सी) । उज्वेकिस्तानमा जारी प्रतिष्ठित फिफा फुटसल विश्वकपमा एसियाली राष्ट्र थाइल्याण्डसँगै पहिलोपटक सहभागिता जनाईरहेको अफगानिस्तानले विजयी शुरुवात गरेको छ ।

समूह बी मा रहेको थाइल्याण्डले क्रोएसियालाई २–१ ले हराउँदै विजयी शुरुवात गरेको हो । सोही समुहमा रहेको दावेदार ब्राजीलले पनि क्युवामाथि १०–० को जित निकाल्दै विजयी शुरुवात गर्यो ।

त्यस्तै समूह सी मा रहेको अर्को एसियाली राष्ट्र अफगानिस्तानले अंगोलामाथि ६–४ को प्रभावशाली जित निकाल्दै विजयी शुरुवात गर्यो । सोही समूहमा रहेको अर्को टोली तथा गत संस्करणको उपविजेता अर्जेन्टिनाले युक्रेनमाथि ७–१ को जित निकाल्यो ।

समूह डी तर्फ स्पेन र कजाखस्तानलाई १–१ को बराबरी खेल्दै अंक बाँडे । सोही समूहको अर्को खेलमा लिबियाले न्युजिल्याण्डलाई ३–१ ले हराउँदै विजयी शुरुवात गर्यो ।

स्मरणीय छ, यसअघि शनिबार भएको उद्घाटन खेलमा समूह ए तर्फ आयोजक उज्वेकिस्तानले नेदरल्याण्डससँग ३–३ गोलको रोमाञ्चक बराबरी खेल्दा सोही समूहको अर्को खेलमा पाराग्वेले कोस्टारिकालाई ६–२ ले हरायो ।

प्रतियोगितामा सहभागि कुल २४ टोलीहरुलाई ६ समूहमा विभाजन गरिएको छ । प्रत्येक समूहको शिर्ष दुई टोली र उत्कृष्ट तेस्रो स्थान हासिल गर्ने थप चार टोलीहरु नकआउट चरणा प्रवेश गर्नेछन् । प्रतियोगिताको समापन ६ अक्टुबरमा दिन हुने कार्यक्रम छ ।