निलकण्ठ । विजय दशमी तथा दिपावलीको अवसर पारी चौथो कुपा कप नकआउट फुटबल प्रतियोगिताको उपाधि म्हेन्दो फोले युवा क्लबले उचालेको छ।

बिहीबार सम्पन्न फाइनल खेलमा म्हेन्दो फोले युवा क्लबले थर्पु युवा क्लबलाई पेनाल्टी सुटआउटमा ५–४ ले पराजित गर्दै च्याम्पियन बनेको हो ।

प्रतियोगिताको विजेता बनेको म्हेन्दो फोलेले उपाधिसहित नगद ६६,६६६ रुपैयाँ हात पार्यो भने उपविजेता थर्पुले ३३,३३३ रुपैयाँसहित ट्रफी, मेडल र प्रमाणपत्रमा चित्त बुझाउन बाध्य बन्यो ।

कुपा युवा समाज, निलकण्ठ–१४, धुवाकोट, धादिङको आयोजनामा गत असोज २३ गतेदेखि शुरु भएको प्रतियोगितामा कुल ४० टोलीहरुले सहभागिता जनाएका थिए ।