फिदिम । आगामी फागुनमा आयोजना हुने पाँचथर गोल्डकप फुटबल प्रतियोगिताको विजेताले पुरस्कारवापत ११ लाख पाउने भएको छ । प्रतियोगिताको पाँचौ संस्करण फागुन २४ गतेबाट हुँदैछ ।

आयोजक पाँचथर क्लबले आइतबार पत्रकार सम्मेलन गर्दै प्रतियोगिताको बारेमा जानकारी दिएको हो । फिदिम माविको खेल मैदानमा हुने प्रतियोगितामा नेपाल र भारतका गरी ८ टिमको सहभागिता रहने आयोजकले जानकारी दिएको छ ।

आयोजकले यस संस्करणमा पुरस्कार राशिमा दोब्बर बृद्धि गर्दै च्याम्पियन बन्ने टोलीले नगद ११ लाख १ हजार १११ र ट्रफी प्राप्त गर्ने जनाएको हो । यसैैगरी, उपविजेता टिमले ५ लाख ५५ हजार ५५५ रुपैयाँ र ट्रफी प्राप्त गर्ने छ ।

यस संस्करणमा ए डिभिजन लिगका चार टिम, अन्तर्राष्ट्रिय दुई टिम, बि डिभिजनको एक र आयोजक क्लब गरी जम्मा ८ टिमको सहभागिता रहने छ । सहभागी टिमहरुको केही समयपछि टुङ्गो लाग्ने आयोजक क्लबका अध्यक्ष कमल तुम्रोकले जानकारी दिए ।