बुढिगंगा । गोल्डेन स्टार युथ क्लब, भलुवा यहाँ जारी प्रथम बुढिगंगा मनसुन कप नकआउट फुटबल प्रतियोगिताको सेमिफाइनलमा प्रवेश गरेको छ ।

आइतबार भएको दोस्रो क्वाटरफाइनलमा गोल्डेन स्टारले दुहबी सुनसरी वार्ड नम्बर ४ लाई २–१ ले हराउँदै सेमिफाइनलमा प्रवेश गरेको हो ।

गोल्डेन स्टारको जितमा दिलिप चौधरी र श्रवण गच्छदारले गोल गरे । पराजित दहुबी सुनसरीका लागि रबी राजवंशीले गोल फर्काएका थिए । खेलमा गोल्डेन स्टारका श्रवण गच्छदार म्यान अफ द म्याच घोषित भए ।

प्रतियोगिता अन्तर्गत साउन २१ गते सोमबारको तेस्रो क्वाटरफाइनल खेल गोल्डेन स्टार युथ क्लब, भलुवा (जुनियर) र पिपियु एफसी, मोतिपुर, मोरङ बीच हुने आयोजकले जानकारी दियो ।

यही साउन २६ गतेसम्म चल्ने प्रतियोगिताको विजेताले उपाधिसहित नगद २५ हजार हात पार्नेछ भने उपविजेताले १५ हजार प्राप्त गर्नेछ ।