दमक । सोमबार आ–आफ्नो खेलमा जित हात पार्दै सिर्जनशील युवा क्लब र बेलबारी फुटबल क्लब यहाँ जारी प्रथम यु–१९ युथ फुटबल प्रतियोगिताको फाइनलमा प्रवेश गरेका छन् ।

दमक स्थित प्रस्तावित मदन भण्डारी रंगशालामा भएको पहिलो सेमिफाइनलमा सिर्जनशीलले मुकुलुङ युवा क्लबलाई २–१ ले हराउँदै फाइनलमा स्थान बनाएको हो ।

सिर्जनशीलको जितमा बिबेक याख्खाले एक गोल गरे भने अर्को गोल विपक्षी टोलीका बुद्ध बहादुरले आत्मघाती गोलका रुपमा गरेका थिए । उता पराजित मुकुलुङका लागि भने युनिस मगरले एक मात्र गोल फर्कँएका थिए । यद्यपि त्यो एक गोल टोलीलाई हार टार्न भने प्रर्याप्त बनेन ।

सोमबार नै सम्पन्न दोस्रो सेमिफाइनलमा बेलबारीले सह–आयोजक चुलाचुली स्र्पोटिङ क्लबलाई टाईब्रेकरमा हराउँदै फाइनलमा स्थान बनायो । निर्धारित समयको खेल १–१ को बराबरीमा टुंगिएपछि टाईब्रेकरमा बेलबारीले चुलाचुलीमाथि ३–२ को जित निकाल्दै फाइनलमा स्थान सुरक्षित गर्यो ।

अब यही असार ३२ गते हुने फाइनलमा सिर्जनशील र बेलबारी उपाधिका लागि भिड्ने छन् । प्रतियोगिताको विजेताले उपाधिसहित नगद ४५ हजार हात पार्नेछ भने उपविजेताले ३० हजारसहित ट्रफी, मेडल प्राप्त गर्नेछ ।