काठमाडौं । रोमाञ्चक र साँघुरो अन्तरको जित निकाल्दै ओखलढुंगा खुला सेभेन ए साईड फुटसल प्रतियोगिता ‘काठमाडौं संस्करण’ को उपाधि मिलन एफसीले जितेको छ ।

फाइनलमा रोयल नेपाल फुटसल (बी) लाई शून्यका विरुद्ध १ गोलको झिनो अन्तरले हराउँदै मिलन एफसीले उपाधि उचालेको हो । मिलन एफसीका लागि सन्दिप कार्कीले गरेको एक मात्र गोल टोलीको जितमा निर्णायक गोल बन्यो ।

खेल यात्री ग्रुपको आयोजनामा सम्पन्न प्रतियोगिताको विजेता बनेको मिलन एफसीले उपाधिसहित नगद १ लाख हात पार्यो भने उपविजेता रोयल नेपाल फुटसलले नगद ५० हजारसहित ट्रफी, मेडलमा चित्त बुझायो ।

विधागतर्फ रोयल नेपाल फुटसलका जोन श्रेष्ठ उत्कृष्ट गोलरक्षक चुनिए । सर्वाधिक गोलकर्ताको पुरस्कार पनि रोयल नेपाल कै उज्ज्वल बिष्टले हात पार्दा मिलन एफसीका युसुफ मलिक प्रतियोगिताको सर्वश्रेष्ठ खेलाडी घोषित भए ।