भद्रपुर । पूर्वेली युथ क्लब, बिर्तामोड यहाँ जारी स्व. आलोक भण्डारी र संजिग गिरी स्मृति चन्द्रगढी कप खुला नकआउट फुटबल प्रतियोगिताको सेमिफाइनलमा प्रवेश गरेको छ ।

शुक्रबार भएको दोस्रो क्वाटरफाइनलमा पूर्वेली युथले बेलटारी फुटबल क्लब, मोरङलाई टाईब्रेकरमा हराउँदै अन्तिम चारमा प्रवेश गरेको हो । निर्धारित समयको खेल गोलरहित बराबरीमा टुंगिएपछि टाईब्रेकरमा पूर्वेली युथ ३–२ ले विजयी बनेको हो ।

खेलमा पूर्वेली युथका पुजन थापा म्यान अफ दि म्याच घोषित भए । प्रतियोगिता अन्तर्गत मंसिर १३ गते शनिबारको तेस्रो क्वाटरफाइनल खेल आयोजक चन्द्रगढी युवा क्लब, भद्रपुर र ब्राईट स्र्पोटिङ क्लब, भारत बीच हुने आयोजकले जानकारी दियो । 

यही आउँदो मंसिर २० गतेसम्म चल्ने प्रतियोगिताको विजेताले उपाधिसहित नगद २ लाख १ हजार हात पार्नेछ ।