भद्रपुर । शनिश्चरे फुटबल क्लब, झापा यहाँ जारी स्व. आलोक भण्डारी-संजिव गिरी स्मृति दोस्रो चन्द्रगढी कप खुला नकआउट फुटबल प्रतियोगिताको सेमिफाइनलमा प्रवेश गरेको छ ।

शनिश्चरेले बाहुडाँगी युथ क्लब, झापालाई टाईब्रेकरमा हराउँदै अन्तिम चारमा प्रवेश गरेको हो । त्यसअघि निर्धारित समयको खेल दुवै टोलीले ३–३ गोलको रोमाञ्चक बराबरी खेलेका थिए ।

निर्धारित समयतर्फ शनिश्चरेका लागि प्रदिप बुढाथोकीले दुई गोल गर्दा थप एक गोल छवी लिम्बुले गरेका थिए । उता बाहनुडाँगीका लागि निशान प्रधानले दुई गोल गर्दा थप एक गोल राज क्षेत्रीले गरेका थिए ।

निर्धारित समयको खेल रोमाञ्चक बराबरीमा टुंगिएपछि टाईब्रेकरमा शनिश्चरेले ४–२ ले नतिजा आफ्नो पक्षमा पार्न सफल भयो । खेलको म्यान अफ दि म्याच भने बाहुनडाँगीका आयुष राई घोषित भए ।

चन्द्रगढी युवा क्लब, झापाको आयोजनामा जारी प्रतियोगिताको विजेताले उपाधिसहित नगद २ लाख १ हजार हात पार्नेछ । फाइनल खेल भने यही मंसिर २० गतेका दिन हुनेछ ।