काठमाडौं । एन्फा राष्ट्रिय लिग फुटबल प्रतियोगिता अन्तर्गत आइतबार भएका शुरुवाती दुई खेलहरुमा विभागीय टोली त्रिभुवन आर्मी फुटबल क्लब र एनआरटीले जित हात पारेका छन् ।

दशरथ रंगशालामा भएको दिनको पहिलो खेलमा आर्मीले नव जन जागृति क्लबलाई ३–० ले पराजित गर्यो । आर्मीको जितमा जर्ज प्रिन्स कार्की, नवयुग श्रेष्ठ र कुनसाङ लामाले गोल गरे । यो जितपछि ८ खेलबाट १७ अंक जोडेको आर्मी शिर्ष तीनको होडमा छ । पराजित नव जन जागृति भने अझैं अंकविहीन छ ।

आइतबार नै भएको दोस्रो खेलमा एनआरटीले चित्लाङ फुटबल क्लबमाथि २–१ को रोमाञ्चक जित हात पार्यो । एनआरटीको जितमा राजिव लोप्चन र टिमोथीले गोल गरे । पराजित चित्लाङले भने एनआरटी कै सनम लिम्बुको आत्मघाती गोल उपहार पाएको थियो । यो जितपछि ९ खेलबाट १९ अंक जोडेको एनआरटी शिर्षताको होडमा कायम छ । पराजित चित्लाङको खातामा भने हाल समान खेलबाट सात अंक रहेको छ ।