काठमाडौं । एन्फा राष्ट्रिय लिग फुटबल प्रतियोगिता अन्तर्गत बुधबार भएका दुई खेलहरु बराबरी नतिजाका साथ सकिएका छन् ।

एन्फा कम्प्लेक्सको मैदानमा भएको दिनको पहिलो खेलमा न्युरोडटिम (एनआरटी) र लालीगुराँस एसोसिएशनले १–१ गोलको बराबरी खेल्दै अंक बाँडे । खेलमा एनआरटीका लागि अन्जन बिष्टले गोल गर्दा लालीगुराँसका लागि आशिष गुरुङले गोल फर्काएका थिए ।

यो नतिजापछि १० खेलबाट एनआरटीको खातामा १९ अंक छ भने लालीगुराँसको खातामा २० अंक रहेको छ । र, दुवै टोली शिर्ष तीन कै होडमा पनि छन् ।

त्यस्तै बुधबार नै भएको दोस्रो खेलमा जावलाखेल युथ क्लब र सातदोबाटो युथ क्लबले पनि समान १–१ गोलको बराबरी खेलेका छन् । जावलाखेलका लागि बौबाकर सिसोखोले गोल गर्दा सातदोबाटोका लागि जगजित श्रेष्ठले गोल फर्काएका थिए ।

यो नतिजापछि ९ खेलबाट जावलाखेलको खातामा १० अंक छ । उता सातदोबाटोको खातामा भने १० खेलबाट ७ अंक रहेको छ ।