काठमाडौं । एन्फा राष्ट्रिय लिग फुटबल प्रतियोगिता अन्तर्गत सोमबार दिनको तेस्रो तथा अन्तिम खेलमा रोमाञ्चक नतिजा निस्किएको छ । लिगतालिकाको शिर्ष स्थानमा रहेको मच्छिन्द्र फुटबल क्लबले स्तब्धपूर्ण हार बेहोर्न पुग्यो ।

दशरथ रंगशालामा भएको खेलमा मच्छिन्द्रले विभागीय टोली त्रिभुवन आर्मी फुटबल क्लबसँग १–२ को स्तब्धपूर्ण हार बेहोर्न पुगेको हो । खेलमा आर्मीका जिलेस्पी जंग कार्की प्लेयर अफ दि म्याच चुनिए ।

यो जितपछि ११ खेलबाट २३ अंक जोडेको आर्मी लिगतालिकाको चौथो स्थानमा छ । उता पराजित मच्छिन्द्र भने हारका बावजुद २५ अंकका साथ शिर्ष स्थानमा कायम छ । यद्यपि दोस्रो टोलीको टोली एपिएफसँग स्पष्ट अग्रता बनाउनबाट भने मच्छिन्द्र चुकेको छ । समान ११ खेलबाट २५ अंक जोडेको एपिएफ गोलभिन्नताले पछि पर्दै दोस्रो स्थानमा छ ।