काठमाडौं । माल्दिभ्समा जारी साफ यु–२० च्याम्पियनसिपमा नेपालले बुधबार लगातार दोस्रो जित हात पार्दै प्रतियोगिताको सेमिफाइनल प्रवेशको सम्भावना बलियो बनाएको छ ।

समूह ए मा रहेको नेपालले आफ्नो दोस्रो खेलमा बुधबार श्रीलंकालाई १–० ले पराजित गर्यो । पहिलो हाफको २४औं मिनटमा सुबास बमले गरेको एक मात्र गोल खेलको निर्णायक गोल बन्यो ।

यो जितसँगै नेपाल सेमिफाइनल नजिक समेत पुगेको छ । स्मरण रहोस, नेपालले आफ्नो पहिलो खेलमा भुटानलाई २–१ ले हराएको थियो । बुधबार नै दोस्रो खेलमा भुटान र माल्दिभ्स भिड्दै छन् । यो बराबरीमा सकिए नेपाल एक खेल अगावै सेमिफाइनलमा प्रवेश गर्नेछ ।

नेपालले समूह चरणको अन्तिम खेलमा २७ मार्चका दिन आयोजक माल्दिभ्सको सामना गर्नेछ । त्यस्तै सोही दिन श्रीलंकाले भुटानसँग खेल्ने कार्यक्रम रहेको छ ।