काठमाडौं । सनसनीपूर्ण जितका साथ नेपाल कै समूह ए मा रहेको भुटान जारी साफ यु–२० च्याम्पियनसिपको सेमिफाइनलमा प्रवेश गरेको छ ।

शुक्रबार समूह ए तर्फको अन्तिम तथा निर्णायक खेलमा श्रीलंकालाई बराबरी र भुटानलाई जित्नै पर्ने दबाब थियो । जसमा भुटान नै सफल बन्यो ।

नेशनल फुटबल स्टेडियममा भएको खेलमा भुटानले श्रीलंकालाई १–० ले स्तब्ध बनायो । खेलको अन्तिमतिर इन्जुरी समयमा ढेन्डुप ग्याल्जेनले गरेको एक मात्र गोल भुटानलाई अन्तिम चारमा पुर्याउन निर्णायक गोल बन्यो ।

यो नतिजापछि ३ खेलबाट ४ अंक जोडेको भुटान समूह ए को उपविजेता बन्दै सेमिफाइनलमा प्रवेश गर्यो । ७ अंक जोडेको नेपाल समूह विजेता बन्यो । त्यस्तै ३ अंक जोडेको श्रीलंका र २ अंक जोडेको आयोजक माल्दिभ्स समुह चरणबाटै बाहिरिए ।