काठमाडौं । जारी साफ यु–२० च्याम्पियनसिपको सेमिफाइनलमा नेपालले गत संस्करणको उपविजेता बंगलादेशससँग खेल्ने तय भएको छ ।

शनिबार समूह बी तर्फको अन्तिम खेलमा बंगलादेशले साविक विजेता भारतसँग १–१ गोलको बराबरी खेल्यो । यो नतिजापछि समान ४–४ अंक भए तापनि गोलभिन्नताका आधारमा भारत समूह बी को विजेता बन्दा बंगलादेश उपविजेता बन्यो । अंकविहीन पाकिस्तान भने समूह चरणबाट यसअघि नै बाहिरिसक्यो ।

उता समूह ए बाट समूह विजेताका रुपमा नेपाल र समूह उपविजेताका रुपमा भुटानले सेमिफाइनलमा स्थान बनाईसकेका छन् । साथै शनिबार बंगलादेश र भारत बीचको खेल पश्चात् सेमिफाइनल समिकरण पनि पूरा भएको छ ।

अब १ अप्रिल (१८ चैत्र) का दिन हुने पहिलो सेमिफाइनलमा नेपालले बंगलादेशसँग खेल्नेछ भने सोही दिन हुने दोस्रो सेमिफाइनलमा भारतले भुटानको सामना गर्नेछ । फाइनल खेल भने ३ अप्रिलका दिन हुने तय भईसकेको छ ।