शिवसताक्षी । झापामा जारी शिवसताक्षी मेयर कप नकआउट फुटबल प्रतियोगिता अन्तर्गत मंगलबार वार्ड नम्बर ९ र वार्ड नम्बर १० ले जित हात पारेका छन् ।

दुधे रंगशालामा भएको दिनको पहिलो खेलमा वार्ड नम्बर ९ ले वार्ड नम्बर ७ लाई पेनाल्टी शुटआउटमा ४–३ ले हरायो । त्यसअघि निर्धारित समयको खेल दुवै टोलीले १–१ गोलको बराबरी खेलेका थिए । खेलमा वार्ड नम्बर ९ का गोलरक्षक युसिन योङहाङ प्लेयर अफ दि म्याच बने ।

त्यस्तै दिनको दोस्रो खेलमा साविक विजेता समेत रहेको वार्ड नम्बर १० ले वार्ड नम्बर २ लाई ४–० को फराकिलो अन्तरले हरायो । खेलमा वार्ड नम्बर १० का ह्याट्रिककर्ता बिबेक योङहाङ प्लेयर अफ दि म्याच घोषित भए । जित हात पारेका वार्ड नम्बर ९ र वार्ड नम्बर १० दुवै टोली क्वाटरफाइनलमा प्रवेश गरेका छन् ।

शिवसताक्षी नगर खेलकुद विकास समितिको आयोजना तथा शिवसताक्षी नगरपालिका, झापाको संरक्षकत्वमा जारी प्रतियोगिताको विजेताले उपाधिसहित नगद ७५ हजार हात पार्नेछ भने उपविजेताले ४५ हजार प्राप्त गर्नेछ । फाइनल खेल यही चैत्र २२ गतेका दिन हुनेछ ।