न्युज फुटबल रेफ्रीको प्रशंसनीय कार्य, असहाय बृद्ध दम्पतीलाई बनाइदिए घर
गोलनेपाल

विराटनगरका फुटबल रेफ्री तथा प्रशिक्षक बिक्रम कार्की (विक्की) ले आफ्नो पेसा भन्दा भिन्नै तर समाजका लागि निकै प्रेरणादायी काम गरेका छन् । ‘एक प्रयास समाज खुशीका लागी हाम्रो अभियान अग्रजलाई सम्मान’ भन्ने नारा सहित कार्कीले एक असहायक दम्पतीलाई बस्नका लागि घर बनाईदिएका छन् ।

विराटनगर १ पोखरिया परोपकार घाटका लालबहादुर श्रेष्ठ र शुशिला श्रेष्ठ दम्पतीको घर गत सालमा आएको बाढीले क्षती पुराएको थियो । श्रीमान् मुटुको रोगी छन् भने श्रीमती प्यारालाईसिसबाट ग्रस्त छिन् र परिवारमा दुइ जना मात्र छन् । श्रेष्ठ दम्पतीका छोरा दिपक श्रेष्ठको पनि निधन भाहिसकेको छ र परिवारमा दुइ मात्र रहेका छन् । कुनै समय फुटवलका गोल किपर रहेका श्रेष्ठ दम्पतीका छोरा दिपक श्रेष्ठको २०५६ सालमा निधन भएको थियो ।

घर नभएर बाहिरै बस्नु पर्ने अवस्थामा पुगेका श्रेष्ठ दम्पतीलाई एउटा घर बनाइदिने सोच बनाउदै रेफ्री कार्कीले विभिन्न क्षेत्रबाट रकम जुटाउन सुरु गरे । सुरुवाती दिनमा रकम उठाउन निकै कस्ट गर्नु परे पनि पछि भने केहि सहज हुदै गयो ।

४०२ दिनको मेहेनत र प्रयासपछि करिब २ लाख पचास हजारको लागतमा असहायक दम्पतीका लागि एउटा सानो र सुहाउँदो घर बन्यो । घर निर्माणको लागि विराटनगर महानगरपालिका, राउत कन्ट्रक्शन, जिवन विकास समाज, सेन्ट म्यारीज स्कुलले निर्माण सामाग्री उपलब्ध गराएका थिए ।

विभिन्न क्षेत्रबाट राम्रो सहयोग प्राप्त गरे पनि अझै पचास हजारको ऋण रहेको बताउदै रेफ्री कार्कीले अब यो ऋण तिरी सक्दा आफ्नो सपना पूर्ण रुपमा सफल हुने बताए । उक्त सहयोग कार्यक्रममा उपस्थित भीम पराजुली, पर्शुराम बस्नेतले दम्पत्तीहरुलाई गरेको सहयोगप्रति कृतज्ञाता प्रकट गर्दै बाँकी रहेको ऋण आफूहरुले तिर्न सहयोग गर्ने बताए ।

त्यो कार्यक्रम सम्पन्न भए पछि घर हस्तान्तरण गर्ने क्षण वास्तवमै शुशिला श्रेष्ठको लागि एउटा खुसिको क्षण थियो । अपत्यारिलो लाग्ने गरी नयाँ घर पाएपछि गहभरि खुशीको आँसु झार्दै शुशिला श्रेष्ठले भनिन् “साँच्चै बिक्की हाम्रो छोरो भएर आएको छ ।”

Post Comments