काठमाडौं । भारतमा जारी प्रतिष्ठित १३३औं डुरान्ड कप अन्तर्राष्ट्रिय आमन्त्रण फुटबल प्रतियोगितामा नेपाली खेलाडीहरु सम्मिलित इण्डियन आर्मीले विजयी शुरुवात गरेको छ ।

बुधबार समूह डी तर्फको आफ्नो पहिलो खेलमा इण्डिन आर्मीले इण्डियन सुपर लिग क्लब चेन्नईन एफसीमाथि शून्यका विरुद्ध १ गोलको जित हात पार्दै विजयी शुरुवात गरेको हो ।

जमशेदपुरमा भएको खेलमा इण्डियन आर्मीका लागि लिटन शिलले गरेको एक मात्र गोल निर्णायक गोल बन्यो । भारतीय सेनामा कार्यरत नेपालका अनुभवी गोलरक्षक भविन्द्र मल्लको कप्तानीमा उत्रिएको इण्डिन आर्मीको टिममा नेपाल कै पूर्व युथ तथा ए डिभिजन खेलाडी एलन थापा, बिकास थापा लगायतले पनि खेलेका थिए ।

त्यस्तै इण्डियन आर्मी कै समूहमा रहेको अर्को खेलमा जमशेदपुर एफसीले आसाम राइफल्सलाई २–० ले हरायो । इण्डियन आर्मीले आफ्नो आगामी खेल ७ अगस्तका दिन आसाम राइफल्ससँग खेल्नेछ । उता चेन्नईनले ४ अगस्तका दिन जमशेदपुरको सामना गर्नेछ ।

प्रतियोगितामा नेपालबाट त्रिभुवन आर्मी फुटबल क्लबले पनि सहभागिता जनाएको छ । समूह एफमा रहेको आर्मीले २ अगस्तका दिन घरेलु टोली शिलोङ लाजोङसँग खेल्दै प्रतियोगिताको शुरुवात गर्नेछ ।